عايزين قطز

موضوع: رد: عايزين قطز الجمعة فبراير 06, 2015 9:42 pm

سنينك العجاف
كلمات علاء فتحى
*************
طالت سنينك العجاف لكن عزيزك جاى
هيجيب معاه الفرح ويجيب معاه الضى
يا واحده عبر الزمان ولا ليكى ابداً زى
يا ما انضربتى كتير ولا قولتى عمرك اى
فى الصبر ضاربه المثل فى العزه كايده الحى
مين اللى يستغنى عنك دانتى النفس والمى
*************************
انتى الحياه والوجود والاهل والاحباب
مانتش مجرد بلد ومانتش مجرد تراب
عمرك الاف السنين ولسه فى عز الشباب
ميهمكيش من الكدابين ولا تعمليلهم حساب
دانتى مقامك فى السما ميزهكيش الضباب
دا الاسد هيفضل اسد حتى ان كلوه الكلاب
**************************
عايزين قال يحكموكى بالقمع والمتاريس
وعمال بيجرفوكى وفاتحين عليكى الهويس
وعمال بيتاجرو فيكى فاكرين مهرك رخيص
فاكرينك اى عروسه وعايزه اى عريس
ماهو اصلهم مش مذاكرين ولا بصوا فى الكراريس
وميعرفوش ان التاريخ مفيهوش مكان لخسيس
خليكى شاهده عليهم وسجلى الملاحيظ
وان طالت السنين العجاف لازم هييجى العزيز

موضوع: عايزين قطز الجمعة فبراير 06, 2015 9:21 pm

عايزين قطز
كلمات علاء فتحى
ـــــــــــــــــــــــــــــــــــ
عايزين قطزاصل التتار جايين
بياكلوا اخضر ويابس وعالوطن متفرعنين
بيحرقوا المساجد وبيقتلوا فى المسلمين
وجيشنا العظيم سايب حدوده وقاعدلى فى الميادين
ــــــــــــــــــــــــــــــــــــــــــــــــــ
يرحم زمانك يا شيخنا العز بن عبد السلام
لا عمرك خضعت لظالم ولا بررت استسلام
ولا عمرك شاركت ف دم ولا قولت اى كلام
دلوقت المشايخ بقوا مخبرين تحت رجلين النظام
ـــــــــــــــــــــــــــــــــــــــــــــــــــــ
امانه ياللى تشوف قطز قول له يجيلنا قوام
ويجيب معاه السيف ويجيب معاه فرسان
وتقوله جيشنا العظيم بئا للعدا خدام
وحكامنا باعو القضيه وماعادلناش حكام
وعين جالوت اتنست واتحولت لكلام
نحكيه لبعض ف سهره حلوه وبعده نرجع ننام
ــــــــــــــــــــــــــــــــــــــــــــــــــــــ
عايزين قطز يرجع يقول وا اسلاماه
ويرفع الرايه والكل يتجمع وراه
عايزين قطز يرجع يلملم شملنا
ويخلى جيشنا يعود ويحمى ارضنا
ومن اللى خان وظلمنا ياخد حقنا
والود تانى يعود بين جيشنا وشعبنا